D’Acel organiséiert zesumme mat hire Studentecerclen ee grousst Open Air Event, wou dir bei 27 Stänn kënnt ënnerschiddlecht Gedrénks schmaachen. Vun Cocktailen iwwer Longdrinks bis hin zu Shotten, hei ass wierklech fir jiddereen eppes dobäi, a falls een tëschenduerch sollt Honger kréien, ass och ee Grillstand op der Plaz.De Studentebal fënnt Freides, de 24. September op der Wiss nieft dem P&R Bouillon statt. Gestart gëtt vun 20h bis 22h mat enger Happy Hour, duerno suergen den DJ Nosi an den Dasic fir gutt Stëmmung. Sollt d‘Wieder deen Dag net sou gutt sinn, maacht iech näischt draus, mat den Navettë kommt dir dréche bis op de Site, wou dir an engem groussen Zelt vun all Wieder onofhängeg mat äre Kolleege feiere kënnt. Déi selwecht Navettë fueren och an der Nuecht ab 03h00 erëm duerch d‘Land fir iech sécher Heem ze bréngen. De genaue Plang fannt dir zwou Woche virum Bal op latenightbus.lu. De Bal fënnt dëst Joer als Covid-Check Event statt, dofir muss jiddereen deen op de Bal wëll goen, geimpft, genesen oder getest sinn. Den Owend selwer wäert et keng Méiglechkeet ginn sech op der Platz testen ze loossen. Duerch de Covid-Check entfält d‘Maskeflicht soubal dir um Site sidd. Ausnamsweis wäerten d‘Ticketen dëst Joer just online verkaf ginn, dat heescht, dass dir net nach spontan an der Oweskeess är Entrée kafe kënnt! D‘Plaze sinn op 1800 Persoune begrenzt, dofir maacht iech bäi: den Éischten ass vir! D’Tickete kënnt dir ab Haut um Site Acel.lu/ticket fir 12 Euro kafen. D’Entrée ass eréischt mat 18 Joer erlaabt.Mir hoffen deen een oder anere kënnen um Studentebal erëm ze gesinn a puer flott Stonne matenee kënnen ze verbréngen.