D’ACEL bitt och erëm dëst Joer a Kooperatioun mat Voyages Emile Weber a senge Membercerclen de „Student fir 1 Dag“ an 20 verschidde Studentestied un. Dëse Projet ënnerstëtzt d’Schüler bei der wichteger Entscheedung, wat si nom Lycées-Ofschloss solle studéieren an a wéi eng Studentestad een dofir goe kann. Beim „Student fir 1 Dag“ hunn d’Schüler d’Méiglechkeet, an der Ouschtervakanz, tëschent dem 6. an dem 19. Abrëll, ee ganzen Dag an enger Studentestad ze verbréngen an esou een éischten Abléck an d’Studenteliewen ze kréien. De Programm op der Plaz gesäit folgendermoossen aus: Den Dag fänkt u mat der Visitt vun den Universitéiten an deene wichtegste Gebaier um Campus, wei d’Bibliothéik, d’Hörsäll an administrativ Gebaier.D’Visitte gi mat engem Mëttegiessen ofgeronnt, befir et da mëttes mat enger Stadbesichtegung weidergeet. De ganzen Dag iwwer stinn d’Lëtzebuerger Studenten de Schüler zur Säit. Dëst erméiglecht de Schüler, all hir Froen ze stellen an esou eng Äntwert aus éischter Hand ze kréien. De Student fir een Dag bitt de Schüler also eng eemoleg Geleeënheet, d’Studentestied op eng aner Aart a Weis kennenzeléieren an hinnen esou hir Entscheedung ëm zukünfteg Studien ze erliichteren.Umelle kann ee sech bis zu zwee Schaffdeeg virum Depart ënner folgendem Link: www.acel.lu/sf1d