Mat hirer lokaler Quartiersmusekschoul a besonnesch der Jugendmusek, der Fanfare Prince Henri, spillt de Veräin eng wichteg Roll an der Musekserzéiung vun eise Kanner an eise jonke Leit. A menger Jugend hat ech selwer d’Geleeënheet, an der Bouneweger Musek ze spille, a weess doduerch haut, wéi wäertvoll déi Erfarung ass a gläichzäiteg awer och, wéi vill Konzentratioun a Motivatioun et kascht.
Ëmmer op fir Neies, och fir nei Wierker vu Komponiste vun heiheem, dréit d’Bouneweger Musek, a kierzlech jo och d’Fanfare Prince Henri, mat enger flotter Kompositioun vum Tim Kleren fir kleng an déck Tromm dozou bäi, datt nei Kreatiounen entstinn an opgefouert ginn.
Fir hire Gala 2019 proposéiert d’Bouneweger Musek e gemëschte Programm a stellt déi jonk Sopranistin Simone Martiny an de Mëttelpunkt. Och dat ass e wonnerbare Geste, fir jonke Leit d’Méiglechkeet ze bidden, fir mat esou engem flotten Orchester opzetrieden.
En häerzleche Merci geet un déi Responsabel vum Comité vum Veräin, den Dirigent Romain Kerschen an all Musikantinnen a Musikanten aus der Bouneweger Musek an der Fanfare Prince Henri fir hiren Asaz am Déngscht vun hirem Quartier, mee awer och vun eiser Kulturzeen. An enger Zäit, wou de Benevolat et ëmmer méi schwéier kritt fir ze iwwerliewen, kann een dat net genuch ënnersträichen.
Vill Erfolleg a vill Freed wënschen ech fir de Galaconcert den 2. Februar am Stater Conservatoire.
Sam Tanson
Kulturministerin
