Déi 39. International Konschthandwierker-Deeg dëse Samschdeg a Sonndeg

Exklusive Anzeigen aus der Printausgabe

Nationalfeierdag fannen all Joer déi International Konschthandwierker-Deeg an der Buerg statt. Esou hunn al déi Intresséiert dëst Joer de 15. a 16. Juni erëm d’Geleeënheet, bei d’Bierger Leit ze kommen a mat Frënn e puer gemittlech Stonnen zesummen ze verbréngen.

De Comité vum Syndicat d’Initiative aus der Gemeng Jonglënster organiséiert dëse flotte Weekend, dee sech zu engem festen a groussen Evenement am Kalenner vun all deenen ageschriwwen huet, déi sech fir d’Konschthandwierk intresséieren, an déi e puer richteg flott Stonnen an der Buerg – zu Buerglënster – erliewe wëllen.

Eng Manifestatioun vun internationalem Charakter

Loosse mer de Comité selwer zu Wuert kommen an déi 39. Editioun virstellen: „Eis Virgänger aus dem Comité vum Syndicat d’Initiative hate scho fréi d’Iddi, eng Aktivitéit an deem eemolege Kader vu Buerglënster ze organiséieren. Esou koum et dann am Joer 1981 zur éischter Oplag vun eise Konschthandwierker-Deeg an der Buerg. Hate mer dat éischt Joer am Ganze sechs Aussteller, si mer elo bei méi wéi 120 Konschthandwierker ukomm.“

Wat am Ufank eng reng regional oder lokal Ugeleeënheet war, huet sech am Laf vun der Zäit zu enger internationaler Manifestatioun entwéckelt. Aus engem Ëmkrees vun dausend Kilometer kommen d’Konschthandwierker op Buerglënster, wat den Titel „International“ Konschthandwierker-Deeg rechtfäerdegt. Am Laf vun de Joren huet d‘Manifestatioun sech zu engem feste Bestanddeel am kulturelle Liewe vun eisem Land entwéckelt. „Mir beméien eis, dass nëmmen haaptberufflech Konschthandwierker hiert Kënnen ënner Beweis stellen, mee mir ginn och enger klenger Zuel vun net professionelle Konschthandwierker, ënnert gewëssene Konditiounen, eng Chance“, schreift de Comité vum Syndicat d’Initiative.

Déi ënnerschiddlechst Handwierker an hir Konscht
 

Exklusive Anzeigen aus der Printausgabe

Wéi gewinnt, sinn déi ënnerschiddlechst Handwierker mat hiren Aarbechten vertrueden. Hei e puer erausgegraff: Bijouen aus ënnerschiddleche Materialien, Buchbënnerei, Comic Keramik, Drockgrafik, Flechtaarbechten, Gaardendekoratioun, Gezei, Hitt, Holzveraarbechtung, Keramik, Klackegéisserei, Kofferaarbechten, Konschtschmadd, Liederwueren, Mënzschneiderei, Messerfabrikatioun, Miniaturen, Miwwelpolsterung, Molerei, Pabeierveraarbechtung, Skulpturen aus ënnerschiddleche Materialien, Stoftveraarbechtung, a.s.w. D‘Konschthandwierker kréien un d’Häerz geluecht, fir op der Plaz ze schaffen, wat awer aus technesche Grënn net ëmmer méiglech ass. Ganz vill Konschthandwierker verbannen déi zwee Deeg, wou se an der Buerg sinn, mat engem touristeschen Openthalt, fir d‘Ëmgéigend an d’Lëtzebuerger Land entweder kennenzeléieren oder emol erëm eng Kéier déi eng oder déi aner Plaz ze besichen.

D’Stänn sinn dëst Joer erëm uechtert ganzt Duerf opgestallt, ronderëm der Place du Village, duerch d‘Gonnerenger Gaass an d’Rue de la Forge erop virun an am Schlass. D’Lëtzebuerger Bicherfrënn hunn déi zwee Deeg och op, an zwar an der Pabeierscheier bei den Ateliere vum Kulturministère (Service d’animation culturelle régionale Est).

Grouss Ënnerstëtzung vu ville Säiten

D‘Duerfveräiner hëllefen den Organisateure bei der Ausféierung vun dëser Manifestatioun, sief et, datt se sech ëm d’Entréeskeese këmmeren, fir dat leiflecht Wuel vu jiddferengem suergen oder bei der Verkéiersreegelung behëlleflech sinn.

Dëst Joer maache bei de Konschthandwierker-Deeg d’Allënster Dueffrënn, d’Chorale Ste-Cécile Buerglënster-Amber, den DT Buerglënster, d’Fanfare Buerglënster, de Volleyball Amber- Lënster an d’Hondsschoul Heureka Grolënster mat. „Wärend engem Spadséiergank iwwer d’Konschthandwierker-Deeg huet een d’Méiglechkeet, bei engem Stand vun eisen Duerfveräiner eng Paus ze maachen a sech ze stäerken, sief et e Patt ze huelen oder e Maufel z’iessen“, ënnersträicht de Comité vum Syndicat d’Initiative, dee sengen Duerfleit a senge Geschäftsleit e grousse Merci ausdréckt fir d’Ënnerstëtzung, déi e vun hinne kritt: „Mir wëlle vun dëser Plaz aus eise Gemengeverantwortleche mat hire verschiddenen Déngschter Merci soen, fir déi Hëllef, déi se eis entgéintbréngen, wa mer se brauchen. A loosse mer eise Kulturministère net vergiessen, deen eis de Beréng vum Schlass all Joer zur Verfügung stellt.“ De Comité schléisst of mat dëse Wierder: „Mir kënnen Iech nach vill iwwert eis Konschthandwierker-Deeg erzielen, fir Iech awer selwer Ier Meenung ze maachen, géife mer soen: Kommt bei eis, dir sidd wëllkomm!“

Weider Informatiounen iwwer Syndicat d’Initiative aus der Gemeng Jonglënster a seng Aktivitéiten: www.sijunglinster.lu. cf

39. International Konschthandwierker-Deeg an der Buerg (Buerglënster)

- Samschdes, de 15. Juni, vun 12 bis 19 Auer
- Sonndes, de 16. Juni, vun 9.30 bis 19 Auer

Parking mat Navette zu Jonglënster op dëse Plazen:
P+R Recycling Center, Centre Polyvalent Gaston Stein, Op der Gare, an der Loupescht, a bei der Gemeng.

Dës Navette fiert am 10-Minutten-Takt.

De Wee fir op d‘Parkinge gëtt zu Jonglënster mat Panneauen ugewisen.

Konschthandwierk, dat begeeschtert

Exklusive Anzeigen aus der Printausgabe

E Wuert vum Lënster Buergermeeschter Romain Reit

Säit 1981 sinn d’Konschthandwierker-Deeg e feste Bestanddeel vun de kulturellen Aktivitéiten an der Gemeng Jonglënster. D’Konschthandwierker-Deeg gehéieren zu deene gréisste kulturelle Manifestatiounen an eisem Land.

All Joer kommen Dausende vu Leit an d’Buerg, fir do iwwert honnert Konschthandwierker aus dem In- an Ausland ze bewonneren, wéi sinn nach live hirem Handwierk noginn. Ënnert dem pittoreske Schlass an den enke Gaasse vun der Buerg kréie souwuel d‘Handwierker wéi d’Visiteuren en eemolege Kader ugebueden a loosse sech vum Flair vun dësen zwee Deeg beandrocken. Munch Visiteur wäert déi eng oder aner Kreatioun erstoen.

A menger Funktioun als Buergermeeschter freet et mech, den Aussteller an och de Visiteuren esou eng eenzegaarteg Geleeënheet ze ginn, fir sech wärend den zwee Deeg verwinnen ze loossen. Dës Manifestatioun ass net nëmmen hei am Land bekannt, mä zitt all Joer vill Leit aus dem noen Ausland un.

Déi zwee Deeg ginn organiséiert vum Syndicat d’Initiative vun der Gemeng Jonglënster. Ech soen e grousse Merci un d’Organisateuren, déi sech all Joer mat vill Idealismus a Kompetenz éierenamtlech an den Déngscht vun der Konscht stellen. E Merci geet och un all Veräiner, déi wärend där Zäit aktiv ronderëm d’Buerg fir Iessen a Gedrénks suergen.

Ech wënschen de Konschthandwierker 2019 eng erfollegräich Oplag an de Visiteuren e puer flott Stonnen an der Buerg.

Romain Reit